انا فهمتك يانديم القصيده

انا فهمتك يانديم القصيده
وكم واحد(ن)غيري من الناس فاهمك
قصايدك من بوح نفسك فريده
الله يلوم اللّي على الوجد لايمك
ابياتك اللّي يوم تشرق جديده
روض(ن)تمشّابه ويحفظ معالمك
تسوقها سوق المطايا بسيده
يامحطّم الرقم القياسي بعالمك
تجي ملحّمها حديده حديده
تصوّرمعاناتك وتحكي تألمك
اقرا بيوتك واتمنا تزيده
في داخلي على اختصارك مخاصمك
ياكثر الي يرسل وينشر بريده
لاكنها ماهي بصمة قسايمك
ياهل ترا قصت غرامك شديده
والصدق في واردك دايم ملازمك
اظنّها كذا فريده وحيده
الله لايخيّب ظنونك ويحرمك
انا الفراق العام جاني وعيده
وحطّم مجاديفي قبل لايحطّمك
كادوا حواسيد النفوس بمكيده
وحبيت افضفض كبت صمتي وعلمك
ياشين نكبات اليال السعيده
ذكراه في جمر الهواجيس يرجمك
ان طاح في واحة حساوي جريده
ادريبها ماهي تهمك وتلزمك
بس المشاعر جابت اليوم عيده
والسبّه ركاب(ن)عليها وسايمك